Við þjónustum
Skötuveisla
Þar sem karlpeningurinn innan KM þjónustunnar er þekktur fyrir mikla matarást var þörf á að halda annað matarboð í desember og á Þorláksmessu var haldin skötuveisla á verkstæðinu. Þar naut Binni litli rútustrákur sín einstaklega vel og sýndi okkur hinum hvernig ástríðufullir kokkar eiga að vera.
Jólahlaðborð
KM þjónustan bauð starfsliði sínu á jólahlaðborð sem haldið var á heimili Unnsteins og Írisar, en þau lögðu sig hvað mest fram við undirbúninginn ásamt Röggu Tobbakonu. Það var mikið borðað, drukkið, hlegið og grátið gleðitárum og var það förupilturinn (bílstjórinn) Viðar sem stóð sig hvað best í að koma mönnum í gráthlátursgírinn... og það var góður gír!
Kaffihúsakvöld Auðarskóla
Fimmtudaginn 2. desember var haldið kaffihúsakvöld í Auðarskóla. Þar var fólki skemmt með söng, leikritum, spurningakeppni milli foreldra og nemenda (foreldrar töpuðu með miklum mun) og einnig var keppni í förðun sem hinir þrælvönu Kiddi og Skjöldur unnu. Hér til hliðar má sjá mynd af Skildi förðunarmeistara að farða supermodelið sitt og eins og sjá má var þetta óaðfinnanlegt hjá þeim félögum. Eyjólfur skólastjóri og Jón Pétur danskennari voru verðugir andstæðingar en haft er eftir sigurvegurum keppninnar að þeim stjóra og dansara sé farsælast að halda sig bara við sín fyrri störf. Gestum var boðið upp á ljúffengt kakó og "skólabakaðar" kökur að hætti nemenda. Þetta góða skemmtikvöld endaði með glæsilegu happdrætti.
Sjá myndir í desembermöppu.
Breyttur opnunartími í vetur
Frá 1. desember 2010 verður almennur opnunartími frá kl. 8:00-12:00 og 13:00-17:00 alla virka daga.
Opnunartími verslunar um jól og áramót:
Ófærð á Bröttubrekku
Stundum er erfitt að vera flutningabílstjóri á sexhjóla bíl í ófærð á leiðinni upp Bröttubrekku og ekki síst þegar dekkin teljast ekki mjög góð. Trailer KM-þjónustunnar stoppaði á suðurleið í dag, fara þurfti með fleiri keðjur og bæta á bílinn. Þetta sýnir að alltaf kemur veturinn jafn mikið á óvart á Íslandi.
Haustfagnaður
Haustfagnaður var í Dölum 22.-23. október. Föstudagurinn byrjaði með lambhrútasýningu og eflaust fleiru sem er látið óupptalið hér og um kvöldið var sviðaveisla, hagyrðingakvöld og endað á balli með Geirmundi. Það var talið að á fimmta hundrað manns hafi verið á sviðaveislunni. Á laugardaginn var lambhrútasýning, opið hrútamót, Íslandsmeistaramót í rúningi, leikir í boði skáta, markaður og fleira í reiðhöllinni. Nokkrar myndir úr reiðhöllini eru komnar í októbermöppu.
Sjúkrabíll endurnýjaður
Gamli sjúkrabíllinn í Búðardal var endurnýjaður á dögunum. Fenginn var nýrri bíll sömu tegundar, Ford Econline, en fimmtán árum yngri. Það verður mikill munur þar sem mikil aukning er á umferð í gegnum Dalasýslu.
Hvít jörð
Alhvít jörð í Dölum. Það ber ekki á öðru en að það sé komin hálka í Dölum og margir vilja komast á nagladekk. Stöðugur straumur hefur verið af bílum í umfelgun hjá KM-þjónustunni, menn sitja sveittir við að negla og umfelga allar stærðir af bílum.
Stóra planið
Í ágúst tóku KM bræður sig til og löguðu planið í kringum KM-þjónustuna. Þá var lögð olíumöl í samstarfi við aðra húseigendur á Vesturbraut 20 á sama tíma og sveitarfélagið lagði á planið á nýju gámasvæði. Gilbert Hrappur og Einar Kristjáns sáu um malarflutning í undirlagið og Sæmundur Jóhanns sá um að hefla og slétta svæðið. Fyrirtækið Blettur lagði olíumölina. Sjá myndir í myndamöppu.