Þetta er Hjörtur Vífill, hann er verkstæðisdrengur hjá KM þjónustunni og tekur að sér módelstörf í hjáverkum. Sími: 8682884.
Það var mikið um að vera í Búðardal í dag (16. júní) en hestamenn gerðu sér glaðan dag og fjölmenntu á móti á reiðvellinum og hið árlega kvennahlaup var gert út frá Leifsbúð. Á meðfylgjandi mynd má þó sjá mestu skrautfjöður dagsins en hin útlimsfagra og litríka verðandi eiginkona Denna (á KM) gekk um og gladdi fólk víðs vegar um bæinn (sjá stærri mynd í júnímöppu).
Það er alltaf gaman að óvæntum uppákomum en ein slík átti sér stað hjá handverkshópnum Bolla í vikunni. En þar voru þær Melkorka og Ásgerður búnar að koma sér fyrir í sólinni og spiluðu á harmonikkurnar. Skemmtileg og svolítið "útlensk" götustemning þar á ferð.
Í gær var vefsíðan budardalur.is opnuð með viðhöfn í Leifsbúð. KM þjónustan óskar eigendum síðunnar til hamingju með flott framtak, það er glæsilegt að sjá hvað mikil vinna hefur farið fram nú þegar - áfram Búðardalur.is!
Laugardaginn 14. apríl fóru 10 félagar úr Glímufélagi Dalamanna ásamt Jóhanni Pálmasyni þjálfara á Ísafjörð þar sem keppt var í Íslandsglímu, grunnskólamóti og sveitaglímu. Að venju stóðu Dalamenn sig vel, náðu oft á verðlaunapall og Guðbjört Lóa Þorgrímsdóttir náði í 2. sæti í Íslandsglímunni. Sjá myndir í aprílmöppu.
Við óskum ykkur öllum gleðilegra páska.
KM þjónustan opnar aftur eftir páskafrí á þriðjudaginn 10. apríl kl. 8:00.
Okkur leist vel á aprílgabb Dalabyggðar í gær og ákváðum að taka þátt með því að auglýsa eftir gúmmíbáti fyrir hvalaskoðunarferðir. Ekkert slíkt er fyrirhugað enda gúmmíbátur tæpast sá besti í slíkar ferðir og hvalurinn hefur ekki látið sjá sig. Myndin með fréttinni er samansoðin úr tveimur myndum, hvalurinn var myndaður í Hestfirði en eins og sjá má var Fellsströndin látin prýða bakgrunninn.
KM þjónustan auglýsir eftir gúmmíbáti til kaupa hið fyrsta en ætlunin er að bjóða upp á hvalaskoðunarferðir á morgun og eins lengi og sést til þess stóra. Ef þú lumar á einum slíkum vinsamlegast hafðu samband við Karl í síma 8956677, Unnstein í síma 8988210 eða Þorbjörn í síma 8999411.
KM þjónustan er 12 ára í dag en fyrirtækið var stofnað 1. mars árið 2000. Þar sem mottumars hefst sama dag var við hæfi að Kalli, annar stofnandi fyrirtækisins, skellti sér í myndatöku svo gestir vefsíðunnar geti notið þessa nýja mottuútlits - í alvöru :)