Við þjónustum
Annað útkall 1. júní
Krani gamli með bilaðan bíl
Útkall var vegna bifreiðar sem hafði bilað við Skriðuland í Saurbæ. Hjólbarðar bifreiðarinnar stóðu fastir þar sem olían var farin af gírkassanum. Þetta var annað útkallið þennan daginn og svo virðist sem Binni hafi setið fastur í Krana gamla því hann sá einnig um þetta útkall.
Kranabíll
1. júní barst útkall frá lögreglu vegna bifreiðar sem fór út af vegi við Bæ í Reykhólasveit. Binni fór á kranabílnum og flutti bifreiðina í Búðardal, þaðan var hún flutt til Reykjavíkur á vöruflutningabíl KM þjónustunnar.
Sumarumferðin byrjuð
Við í KM þjónustunni verðum óneitanlega vör við aukna umferð á vegum úti nú í upphafi júnímánaðar. Það sýnir sig m.a. í aukningu á útköllum kranabíls. Vikan hófst á útkalli hjá Unnsteini að Ljá þar sem Nissan bifreið hafði oltið ofan í skurð en engin slys urðu á fólki.
Í öðru útkalli barst beiðni um aðstoð frá kranabíl á Þorskafjarðarheiði vegna Musso jeppa. Í fyrstu taldi eigandi jeppans framdrifið vera brotið en eftir símtal töldu menn líkur á því að um bilun væri að ræða sem síðar reyndist vera hægt að lagfæra á staðnum. Gísli leysti það verk vel af hendi og ferðalangarnir gátu haldið áfram áætlaðri ferð sinni í sumarbústað á Vestfjörðum.
Fljótlega eftir útkallið á Þorskafjarðarheiði fór Binni á kranabílnum að Gunnarsstöðum á Skógarströnd. Útkall hafði borist frá Lögreglunni en tveir útlendingar höfðu lent í því óhappi að velta bílaleigubíl sínum, Suzuki Jimny.